હે ઈશ્વર! હે ઈશ્વર! આ કપાયેલી પાંખવાળું એક પક્ષી છે અને એની ઉડાન ખુબજ ધીમી છે -તેની સહાયતા કર કે એ સમૃદ્ધિ અને મુક્તિના શિખર તરફ ઉડાન ભરી શકે, અનંત અંતરિક્ષમાં અત્યંત આનંદ અને ખુશીથી સર્વત્ર વિચરણ કરી શકે, બધા પ્રદેશોમાં તારા સર્વોચ્ચ નામના મધુર શૂરનો નાદ ગજાવી શકે, આ આહ્વાનથી કાનને આનંદિત કરી શકે, અને તારા માર્ગદર્શનના ચિન્હોનું દર્શન કરીને આંખોને તેજસ્વી બનાવી શકે.

હે સ્વામી! હું એકલો, અટૂલો અને દીનહીન છું. તારા સિવાય મારું બીજું કોઈ પીઠબળ નથી, તારા સિવાય બીજો કોઈ મદદગાર નથી, તારા સિવાય બીજો કોઈ પાલનહાર નથી. તારી સેવામાં મને દ્રઢ બનાવ, તારા દેવદૂતોની સેનાથી મને મદદ કર. તારા પાવન શબ્દના પ્રસારમાં મને વિજયી બનાવ અને મને તારા લોકમાં તારી વિવેક વાણીનો ઉચ્ચાર કરવા યોગ્ય બનાવ. ખરેખર, તું નિર્બળનો સહાયક અને નાનાઓનો રક્ષણહાર છે, અને સાચે જ, તું શક્તિશાળી, સમર્થ અને અબાધિત છે.

– અબ્દુલબહા

હે ઈશ્વર, મારા ઈશ્વર! તારા વિશ્વાસુ સેવકોની અહં અને વાસનાની બૂરાઈથી સુરક્ષા કર, બધા પ્રકારના વેરઝેર, ઘૃણા અને અદેખાઈ સામે તારા માયાળું પ્રેમની જાગરૂક દ્રષ્ટિથી એમનું રક્ષણ કર. તારી દેખરેખના અજેય ગઢમાં એમને આશરો આપ અને સંશયની બરછીઓથી સહી સલામત રાખીને એમને તારા ભવ્ય સંકેતોની અભિવ્યક્તિ બનાવી દે, તારી દિવ્ય એકતાના દિવ્ય-વસંતમાંથી ફેલાતા તેજસ્વી કિરણોથી તેમના મુખને કાંતિમાન બનાવ, તારા પવિત્ર રાજ્યમાંથી પ્રગટતા શ્લોકથી એમના હ્રદયોમાં હર્ષનો સંચાર કર, તારી મહિમાના સામ્રાજ્યમાંથી આવતી સર્વ- સમર્થ શક્તિ દ્વારા તેમને સમર્થ બનાવ.

તું પરમ ઉદાર, રક્ષક, સર્વ-શક્તિમાન, કૃપાળુ છે. 

– અબ્દુલબહા

હે પ્રભુ! અમે નિર્બળ છીએ, અમને સબળ બનાવ. હે ઈશ્વર! અમે અજ્ઞાની છીએ; અમને જ્ઞાની બનાવ. હે પ્રભુ! અમે દરિદ્ર છીએ; અમને શ્રીમંત બનાવ. હે ઈશ્વર! અમે મરેલા છીએ; અમને જીવંત બનાવ. હે પ્રભુ! અમે સ્વયં હિન છીએ; અમને તારા રાજ્યમાં ગૌરવશાળી બનાવ. જો તું અમને સહાય કરે, હે પ્રભુ! તો અમે તેજસ્વી તારા જેવા બનીશું. જો તું અમને સહાય નહિ કરે તો અમે ધરતીથી પણ અધમ બની જઈશું. હે પ્રભુ! અમને બળવાન બનાવ. હે ઈશ્વર! અમને વિજય અપાવ. હે ઈશ્વર! અમને અહંમને જીતવાની તથા વાસનાઓને વશમાં રાખવાની શક્તિ આપ. હે પ્રભુ! અમને ભૌતિક દુનિયાના બંધનોથી મુક્તિ અપાવ. હે પ્રભુ! તારી પવિત્ર ચેતના દ્વારા અમને સચેતન કર કે જેથી અમે તારી સેવા કરવા ઊભા થઈએ, તારી ભક્તિમાં લીન થઈએ અને તારા સામ્રાજ્યમાં નિષ્ઠાપૂર્વક પ્રયાસ કરીએ. હે પ્રભુ! તું સમર્થ છે. હે ઈશ્વર! તું ક્ષમાદાતા છે. હે પ્રભુ! તું કરુણામય છે.                                                                

– અબ્દુલબહા

હે પ્રભુ! અમે દુ:ખી છીએ, અમને તારી કૃપા પ્રદાન કર. અમે ગરીબ છીએ, તારી સંપતિના મહાસગરમાંથી અમને પણ એક અંશ આપ. અમને જરૂર છે, અમને સંતુષ્ટ કર. અમે હીન છીએ, અમને ગૌરવ આપ. આકાશમાં ઊડતા પક્ષી અને ધરતી પરના પશુઓને તું જ આહાર પૂરો પાડે છે, અને બધા જીવો તારી સંભાળ અને પ્રેમાળ કરુણાનો હિસ્સો પ્રાપ્ત કરે છે.

તારી અદભૂત કૃપાથી આ નબળા જીવને વંચિત ન કર અને તારી શક્તિ દ્વારા આ લાચાર આત્મા ઉપર તારી કૃપા વરસાવ.

અમને અમારું રોજનું ભોજન આપ અને જીવનની જરૂરિયાતોમાં તારું વધારાનું વરદાન દે, જેથી અમે તારા સિવાય બીજા કોઈ પર નિર્ભર નહિ રહીએ, સંપૂર્ણ રીતે તારી સાથે જ સંપર્ક રાખીએ, તારા માર્ગે ચાલીએ અને તારા જ રહસ્યો પ્રગટ કરીએ. તું સર્વશક્તિમાન, અને સમસ્ત માનવજાતનો દાતા છે.

– અબ્દુલબહા

હે નાથ, મારા ઈશ્વર! તારા પ્રિયજનોને તું સદાય સહાય કરજે કે જેથી તેઓ તારા ધર્મમાં દ્રઢ રહે, તારા માર્ગે ચાલે, તારા ધર્મમાં અડગ રહે. તેમને તારી કૃપા પ્રદાન કર કે જેથી તેઓ અહં અને વાસનાના હુમલા સામે ટકી શકે, દિવ્ય માર્ગદર્શનના પ્રકાશનું અનુસરણ કરી શકે. તું સર્વ-શક્તિમાન, દયામય, સ્વયંપૂર્ણ, દાતા , કરુણાંમય, સમર્થ અને સર્વ-ઉદાર છે.

– અબ્દુલબહા

હે મારા સ્વામી, મારા પ્રિયતમ, મારી આકાંક્ષા! મારી એકલતામાં મારો મિત્ર બન અને મારા દેશવટામાં મારો સાથી; મારું દુ:ખ દૂર કર. એવું વર દે કે હું તારા સૌંદર્યને સમર્પિત બનું. તારા સિવાય બીજા બધાથી મને વિરક્ત કરી દે. તારી પવિત્રતાની સુગંદથી મને આકર્ષી લે. મને તેમનો સંગ કરાવ જેઓ તારા રાજ્યમાં તારા સિવાય બીજા બધાથી વિરક્ત થઈ ગયા છે, જેઓ તારા પવિત્ર ઉંબરાની સેવા કરવાની ઝંખના રાખે છે અને તારા ધર્મનું કાર્ય કરવા માટે તૈયાર ઊભા છે. મને તારી એવી સેવિકાઓમાંથી એક બનાવ જેમણે તારી સુપ્રસન્નતા પ્રાપ્ત કરી લીધી છે. સાચે જ તું કૃપાળુ અને ઉદાર છે.

– અબ્દુલબહા

હે ભગવાન, મારા આત્માને નવસ્ફૂર્તિ અને હર્ષોલ્લાસથી ભરી દે. મારા અંત:કરણને શુદ્ધ કરી દે. મારા મનને આલોકિત કરી દે. હું મારા સઘળા કાર્યો તારા જ કરકમળમાં સુપ્રત કરું છું. તું મારો પથપ્રદર્શક છે, મારો આશ્રય છે. હવેથી હું દુ:ખી અને ઉદાસ નહિ રહું, હું ખુશ અને આનંદિત રહીશ! હું હવેથી ચિંતામગ્ન નહિ રહું, કષ્ટોથી મુંઝાઈ નહિ જાઉં. હું જીવનની અપ્રિય વાતો પર મારુ મન લગાવીશ નહિ.

હે પરમાત્મા! તું મારા પોતાના કરતાં પણ વધારે મારો મિત્ર છે. હે નાથ, હું મારી જાત તને સમર્પિત કરું છું.

– અબ્દુલબહા

શું પરમાત્મા સિવાય સંકટોને દૂર કરનાર અન્ય કોઈ છે? કહી દો: એક માત્ર પરમાત્મા જ સ્તુત્ય છે! તે જ છે પરમાત્મા! સર્વ તેના સેવકો છે, અને તેની જ અજ્ઞાના બંધનમાં છે!

– બહાઉલ્લાહ

પ્રભુ એવું વરદાન આપ કે, એકતાનો પ્રકાશ આખી પૃથ્વીને આવરી લે અને “સામ્રાજ્ય પ્રભુનું છે” આ મહોર તેના લલાટ પર અંકિત થઈ જાય.

– બહાઉલ્લાહ

હે મારા ઈશ્વર! તારા પરમ શક્તિશાળી નામે હું તારી પાસે માંગુ છું કે તું તેમાં મારી સહાયતા કર જે તારા સેવકોના કાર્યકલાપોને સમૃદ્ધ બનાવવાનું, અને તારા નગરોના વિકાશનું કારણ બને. ખરેખર, બધી ચીજો પર તારી સત્તા છે.

 – બહાઉલ્લાહ